葉蒨文大膽全真空上陣
穿大露背 Gucci 舊晚裝拍 MV

蟄伏多年的樂壇一姐葉蒨文（沙麗），重出江湖後第一首新歌《傷逝》昨日終於誕生，據知，當初唱片公司誤會沙麗不要《傷逝》這首歌，故放棄了，有其他歌手很鍾意這首歌，幾乎已據為己有，沙麗知道後十分失望，唱片公司便極力爭取，最終出高價買得版權，以示對沙麗重視。

出動頂級髮型化妝師
而「紅」唱片公司除於昨日派歌上電台播放外，又第一時間安排沙麗拍ＭＶ，更搵了頂尖級化妝師 阿 Zing 和髮型師 Billy 幫她扮靚靚，配合沙麗星級卡士，而沙麗亦隆重其事，穿大露背 Gucci 晚裝拍攝，為達視覺完美，沙麗更大膽地上、下皆真空上陣，十分專業。

九八年演唱會過
然而，沙麗卻自爆這件晚裝是九八年演唱會上過，令記者愕然，想不到貴為巨星的沙麗竟舊衫拍 Ｍ Ｖ，她笑笑說：「我唔好意思使公司太多錢嘛，我歐洲買好多新衫，用幾十萬，但全部都係冬裝，我覺得呢條裙好適合拍呢首歌，唔需要有錢就用，要使得值得，我一直好低調，怕人話我寸，唔好意思使公司太多錢。」沙麗坦言：「以前自己唔夠勤力，我一直唔覺得自己紅過，今次公司俾好多心機做我，佢壓力仲大過我，依家歌手好多十幾歲，我已經四十一歲，我驚我企台好似 Aunti 咁，好在我心態年輕，哈哈！」

沙麗嫌自己太肥，怕內衣褲後會穿崩，故上、下皆真空上陣，十分專業。