10-12-2002

Metro Radio

陳少寶有意阻撓李克勤出席葉蒨文音樂會

作晚,新城娛樂台主辦的葉蒨文真我在舞台音樂會,在一片歡呼聲中圓滿結束,雖然大家都覺得沙麗表現好出色,但佢只俾自己八十分,反而俾其他嘉賓一百分,認為李克勤、趙頌茹、EO2、E-kids一班嘉賓表現出色,掀起成晚既高潮,基於反應熱烈,沙麗透露準備明年九月正式再開演唱會,不過入完紙之後,佢又覺得好緊張,所以暫時尚在考慮當中

演出完後,嘉賓之一李克勤自爆環球高層陳少寶有意力阻出席沙麗的音樂會,原因係陳少寶認為克勤同沙麗屬於兩間唔同唱片公司,克勤唔應該為其他公司既歌手打氣,沙麗聽到呢個消息,表現得難以置信,沙麗話,如果想樂壇有進步,歌手與歌手之間擦出火花,做出好騷俾觀眾睇,就唔應該存在呢類門戶之見
,沙麗認為歌手之間既友情,遠遠重要過玩呢類政治把戲!

Metro Radio

趙頌茹為葉蒨文徹夜失眠

葉蒨文真我在舞台音樂會上面,師妹趙頌茹擔任其中一位表演嘉賓,第一次見大場面,阿Yu由上台驚到落台,表演前一晚更加睡唔著,演出當晚,阿Yu又唔俾媽咪黎睇騷,怕自己會愈睇愈緊張,究其原因,阿Yu話因為第一次響咁大既場地演出,加上又第一次公開跳舞,仲要唱首難度極高既《談情說愛》,緊張到阿Yu腳震震,好彩最後都能夠順利完成,阿Yu分數五至六十分,算係剛剛合格!

沙麗要求一向嚴格,但阿Yu強調沙麗並冇鬧過佢,反而沙麗讚過佢夠勤力,阿Yu覺得勤力係應份既,因為人地俾機會自己唱歌跳舞,唔好好把握,即係對自己唔住!

Metro Radio

李克勤舞台重遇葉蒨文如見舊朋友

葉蒨文真我在舞台音樂會,請黎李克勤做特別嘉賓,兩位巨星既第一次相遇,克勤仲記憶猶新,克勤記得十幾年前,沙麗帶佢去澳州登台,當時克勤仲係小朋友,沙麗帶佢周圍去玩,大家玩得好開心,克勤仲帶埋當年同沙麗一齊登台既珍貴相片上台懷緬一番,好有紀念價值!

咁多年冇響舞台同沙莉交手,克勤感覺就如重遇老朋友,佢大讚沙麗既歌聲令佢汗顏,希望沙麗可以唱多d歌,唔好久唔久就同老公林子祥去打golf,收埋自己!


Compiled at Sally Yeh: The Effervescent Queen of Pop
http://www.sallyeh.net